Taith Côr Cardi-Gân i Gaerdydd

Ar 4 Hydref 2002 bu Côr Cardi-Gân ar daith gymdeithasol i Gaerdydd. Pwrpas y daith oedd rhoi perfformiad yn Amgueddfa Cymru, Sain Ffagan, ac roedd hefyd yn gyfle i aelodau newydd  ddod i adnabod aelodau eraill y côr ac yn esgus da i gael ychydig o hwyl!!

Roeddem yn aros yng Ngwesty Jury’s ac ar ôl cyrraedd y gwesty, aethom i weld rhai o brif atyniadau’r ddinas, na, nid yr Amgueddfeydd ond y Clybiau Nos!  Cafodd bawb noson wych, yn enwedig Anwen Davies a syfrdanodd pawb (h.y. pawb yn y clwb!!) gyda’i dehongliad diddorol  ag egniol o’r gân ‘Kiss’ gan Holly Vallance! Campus Anwen!

Dydd Sadwrn, roedd hi’n ras wyllt rownd y siopau cyn i bawb gyfarfod yn ‘Yr Ŵyl Gwrw Genedlaethol’ a gynhaliwyd yn neuadd y ddinas! Yn dilyn hyn aeth rhai o aelodau dewraf y côr i sglefrio. (Er fod gen ti dalent naturiol yn y maes yma Catrin -mae gen ti dipyn o waith eto cyn cyrraedd safon Jane Torville !!)

Nos Sadwrn aeth y côr am bryd o fwyd i fwyty a thafarn ‘Y Mochyn Du’ yng Ngerddi Soffia. Roedd y bwyd yn fendigedig a’r adloniant yn well byth!! Dechreuodd y côr ganu ychydig o ganeuon ysgafn, ac roedd Rhian Dafydd yn amlwg wedi ei phlesio  yn fawr gyda safon gwych y canu cyn iddi ddod yn amlwg iddi fod dau gôr arall yn y dafarn- Cordydd a Chôr Godre’r Garth!! Erbyn diwedd y noson roedd pawb wedi ymuno yn y canu, a phawb wedi cael noson i’w chofio!

Ar ddydd Sul, 5 Hydref aethom i Sain Ffagan  i berfformio rhai o’n caneuon yn Neuadd Oakdale. Cynhaliwyd dau berfformiad, un am 1.00 o’r gloch a’r naill a, 3.00. Roedd y ddau berfformiad yn wahanol yn cynnwys eitemau lleisiol unigol ac offerynnol ynghyd ag eitem glocsio ddigri gan Eirith a Siwan! Bu’n ddiwrnod llwyddiannus iawn ac roedd hi’n  bleser cael cynnal perfformiad mewn awyrgylch mor ddymunol.

Bu’r daith yn gyfle gwych i gymdeithasu, i gyfarfod a rhai o aelodau newydd y côr ac i wneud cysylltiadau newydd – gan i ni drafod y posibiliadau o gymryd rhan mewn cyngerdd gyda Chordydd yn y dyfodol. Wrth i ni adael y ddinas fawr, cytunodd pawb eu bod wedi cael penwythnos a hanner a bod rhaid cael taith arall yn reit fuan!!

Gwenllian Jones

Gohebydd Y Wasg