neu fel mae Rhian yn ddweud
"Cliciwch i chwyddo!"

Taith Côr Cardi-Gân i Lundain

Ar ddechrau mis Hydref 2001, bu Côr Cardi-Gân a rhai aelodau o Aelwyd Bro Ceredigion (ABC) ar ymweliad â Llundain. Gwahoddwyd y Côr rai misoedd yn ôl bellach i gynnal cyngerdd yng Nghanolfan Cymry Llundain yn Gray’s Inn Road, ac wrth gwrs, roedd hi’n amhosib gwrthod y fath gynnig. Daeth rhai o griw ABC gyda ni ar y daith i’n cynorthwyo gyda rhai o’r eitemau adloniadol.

Cychwynnwyd ar y daith ar brynhawn Gwener, 5 Hydref 2001 am 4.00 o’r gloch y prynhawn ac roeddem wedi llogi bws gan gwmni G & M yn Llambed ac Emrys oedd wrth y llyw.

Ar ôl teithio am tua 3 awr a hanner fe arhosom am damaid o swper mewn un o’r safleoedd gwasanaethau ar yr M4, yna ymlaen â ni a chyrraedd Gwesty’r Thistle King’s Cross yn Llundain, tua 11.30 o’r gloch.

Wedi cofrestru a mynd â’r bagiau i’r ystafelloedd, rhaid oedd dod lawr i’r parlwr ac ardal y bar i ymlacio, gallech feddwl ei bod yn gynnar y nos, roedd y penwythnos hir-ddisgwyliedig wedi cyrraedd o’r diwedd. Dechreuodd rhai glwydo tua un o’r gloch, ond daeth i’r amlwg fore trannoeth ei bod hi’n 4.30 y bore ar y diwethaf yn clwydo!! Pwy tybed!

Roedd Dydd Sadwrn yn rhydd i bawb wneud fel ag y mynnent. Aeth rhai yn gynnar iawn i ymweld â’r ‘London Eye’, profiad gwych mae’n debyg, eraill i grwydro rhai o strydoedd Llundain yn amser eu hunain

Roedd pawb yn cwrdd yn Theatr Victoria Apollo erbyn 2.30 y prynhawn gan ein bod wedi archebu tocynnau i weld y sioe gerdd “Starlight Express”. Roedd hi’n amlwg fod y sioe o flaen ei hamser pan agorodd hi’n gyntaf, yn sôn am y gwahanol fathau o drenau sydd i’w cael. Roedd yr actorion yn cyfleu hyn oll drwy berfformio’r sioe ar ‘Roller Blades’. Mae’r sioe yn gorffen ym mis Ionawr 2002 ar ôl rhedeg am 17 mlynedd, felly rhaid dweud ein bod yn falch i ni gael y cyfle i’w gweld cyn iddi ddod i ben.

Wedi hyn, nôl â ni i’r gwesty i newid i ddillad y Côr yn gyflym, yna lan i Ganolfan Cymry Llundain. Roedd y cyngerdd yn cychwyn am 7.30 o’r gloch ac roedd angen cynhesu’r lleisiau ac ati.

Cafwyd cyngerdd ardderchog a’r gynulleidfa yn gwerthfawrogi'r amrywiol ddoniau oedd ar gael ar y noson. Cafwyd unawdau gan Gareth John a Rhian Dafydd, sgets dan ofal criw ABC, parti bechgyn ac arwain digri a ffraeth gan Arwel Davies ac Elan Dafis ac wrth gwrs amryw o berfformiadau gan y Côr. Diolch i bawb am sicrhau bod y cyngerdd yn gymaint o lwyddiant.

Cafwyd croeso twymgalon yno, a noson dda iawn, ac ar ôl y cyngerdd cafwyd cyfle i gymdeithasu â’r gynulleidfa.  Roedd nifer o aelodau’r côr yn gwybod bod ei perthnasau yno, a rhai aelodau yn cwrdd ag aelodau o’r teulu nas gwelwyd o’r blaen.  Yn y lolfa cawsom ddigon i’w fwyta a chyfle i wlychu pig ar ôl y cyngerdd.  Roedd yn fore Sul arnom yn dweud ffarwel â’n cyfeillion newydd, ar ôl cyfnewid nifer o storïau a hanesion, yna rhaid oedd cerdded nôl i’r gwesty.

Ar ôl brecwast Dydd Sul, rhaid oedd pacio’r cês a’i roi ar y bws, yna roedd pawb yn rhydd tan 3.00 o’r gloch.

Ar y ffordd nôl i Gymru arhosom am fwyd yn y Wentwood Inn ger Casnewydd.  Cawsom bryd o fwyd blasus iawn a gyda phawb â’i fola yn llawn cysgodd y mwyafrif o hynny ymlaen. Aeth yn  hanner nos cyn inni gyrraedd nôl i Aberaeron, a rhaid dweud fod yr hen ddywediad yn ddigon gwir  – ‘does unman yn debyg i gartref’.

Roedd y daith wedi bod yn flinedig, ond yn un fythgofiadwy hefyd am nifer o resymau.  Diolch yn fawr iawn i’r aelodau hynny a dreuliodd oriau lawer yn cael y manylion i gyd i fwcwl a gobeithio hefyd y cawn wahoddiad yn ôl yn fuan i Ganolfan Cymry Llundain.

Gordon Harries

Gohebydd y Wasg