Cor Cardi-gan - ar daith

	Côr Cardi-Gân yn lansio gwefan www.corcardi-gan.com (Cliciwch ar y llun i weld mwy)
Ar Nos Wener, 20 Medi 2002 cynhaliwyd noson gymdeithasol yn neuadd bentref Dihewyd i ddathlu lansiad gwefan newydd Côr Cardi- Gân, sef : www.corcardi-gan.com.
	Fel mae nifer o'r darllenwyr yn gwybod bellach, Côr Cymysg i ieuenctid o ddeunaw oed i fyny yw Côr Cardi-Gân, sy'n denu aelodau ar draws y sir gyfan, ac roedd y noson hon yn noson arloesol a hanesyddol ym mywyd y côr. Penderfynwyd ar gynnal y noson yn neuadd Dihewyd am fod y neuadd wedi ei hadnewyddu yn ddiweddar at ddefnydd y gymuned ac am fod 4 o aelodau'r côr yn dod o'r ardal hynny. Mae'r neuadd hefyd o fewn tafliad carreg i gartref y côr, sef Theatr FelinFach.
Roedd mynediad i'r lansiad drwy wahoddiad yn unig, ac ymhlith y gwahoddedigion roedd cynrychiolwyr o nifer o fudiadau ieuenctid Ceredigion, megis Gwasanaeth Ieuenctid y Sir. Mudiad y Ffermwyr Ifanc, Urdd Gobaith Cymru, Theatr FelinFach, Undeb Amaethwyr Cymru, Ffatri Fenter Menter a Busnes yn ogystal â Chynghorwyr y sir a chynrychiolwyr o Gynghorau Cymuned y sir. Bu'n noson lwyddiannus a hwylus dros ben gydag Euros Lewis yn arwain a llywio'r noson yn ei ffordd unigryw ei hunan. Roedd Euros yn un o'r bobl allweddol a fu ynghlwm â sefydlu'r côr dair blynedd yn ôl ac mae wedi ei weld yn tyfu ac yn ffynnu. Cafwyd nifer o amrywiol eitemau yn ystod y nos gan gynnwys eitemau gan y côr a dawnsio gwerin a chlocsio gan Aelwyd Hafodwenog. Cafwyd cyflwyniad o'r wefan gan y cynllunydd a'r gwefeistr, sef Graham Jones sydd hefyd yn digwydd bod yn aelod o'r côr!
	Mae'r côr yn cynnal llawer o gyngherddau o fewn yr ardal a thu hwnt ac rydym hefyd yn codi arian at achosion da. Dros y ddwy flynedd ddiwethaf penderfynwyd cefnogi 'Ty Hafan' sef yr unig hosbis i blant yng Nghymru sydd wedi ei lleoli yn Sili ym Mro Morgannwg, ac fel rhan o'r noson cyflwynwyd siec o dros £370 gan Gadeirydd y Côr, Bryan Davies i Swyddog Datblygu'r elusen yn y Canolbarth, sef Phil Thomas.
Mae'r côr ei hunan yn falch iawn o dderbyn unrhyw gymorth ariannol tuag at amrywiol adnoddau megis gwisg swyddogol, ffolderi ac yn y blaen ac rydym wedi bod yn ffodus iawn i ddenu noddwyr cefnogol yn y gorffennol. Roedd hi'n fraint gennym felly i dderbyn siec hael iawn gan Rhian Thomas, un o Swyddogion Rhanbarthol Undeb Amaethwyr Cymru yng Ngheredigion am £500 tuag at y gost o brynu piano trydan, symudol. Derbyniwyd siec yn ogystal gan Ffatri Fenter Menter a Busnes tuag at y gost o gynnal y noson.
	Yn dilyn yr eitemau cerddorol cafwyd lluniaeth ysgafn a blasus iawn wedi ei baratoi gan Euronwy Williams, Dihewyd a'i thîm o weithwyr diwyd. Diolch hefyd i Rowland Evans, Tafarn Dyffryn Aeron am ddarparu'r bar yn ystod y noson. Yn sicr, bu'r lansiad yn noson gofiadwy iawn yn hanes y côr ac yn gyfle i ni wneud cysylltiadau newydd â phobl a mudiadau eraill yng Ngheredigion.